De Drangdüwels sünd een plattdüütsche Folkrockkapell ut dat Hart vun Holsteen. De söben Jungs hebbt sick in Harvst 1999 tohoop funnen un hebbt siet de Tied konsequent ehren Weg dörch een niege Ort norddüütsche Kulturidentität opnahmen.
De Idee is eenfach un eegentlich siet lange Tied överfällig: Allens wat bit dorhen as norddüütsche oder plattdüütsche Musik ut düsse Eck vun uns Republik kamen is, weer mehr prägt dörch Leedermokers un all to bravet Leedgood un hett so een Weekteekner-Romantik mit de Norden assozieert, de de Charakter un de norddüütsche Mentalität eenfach nich gerecht ward. Siet mehr as 20 Johren gifft dat överall sünst in Europa Kapells, de keen Problem dormit harrn, ehr regionale Musikkultur tiedgerecht optobereeden ohn sick dorbi een Zacken ut de Kron to breken ! Warüm also nich uns schöne plattdüütsche Spraak mit een goode Portschion Rackenraul kombineeren un eben düsse Spraak, de een Grootdeel Identität mit de Norden an sick utmokt, ok för junge Lüüd wedder togänglich moken ?! Dat meent op de anner Siet natürlich ok, dat Lüüd ut öllere Semester, de mit dat Plattdüütsche liekers verwöddelt sünd, mit De Drangdüwels ok wat anfangen künnt.

De Musik de se speelt is tohoopsett ut Bearbeitungen vun ole Volkswiesen (toÂ’n Bispeel ole Shanties un Leeder vun See un Arbeit) un een Masse eegen Leeder, de typisch norddüütsche Eegenorten toÂ’n Inhalt hebbt. Dat beste Bispeel hierför is de Leederzyklus över uns norddüütschen Robin Hood: Klaus Störtebeker ! Un so as sick dat för een würklich norddüütschet Gemöt tohört, ward all dat mit örnlich Pepp vördragen ! Twischendörch laat se sick dat ok nich nehmen, de Leeder an sick un ok aktuelle Themen mit een groot Portschion Uhlenspeegelee to kommenteeren. Un all dat konsequent op Platt !!!

Siet 2002 is ok de för norddüütsche Musik bekannte Kapell Torfrock op De Drangdüwels opmerksam worrn: Se hebbt as Vörwegkapell in Stadtpark Hamborg un ok op de Bagaluten-Wiehnachtstour tohoop speelt, un ok 2003 sünd een Barg gemeensame Optritte mit Torfrock klor ! Dat meent aver nich, dat se nich alleen speelen künnt ! In Gegendeel: De Drangdüwels hebbt dörchut een vörwiesbaret avendfüllendet Programm, dat sick sehen laten kann!

Ehr niege CD, de in 2003 op de Markt kümmen is un vun Raymond Voß vun Torfrock produzeert ward, repräsenteert een gooden Querschnitt över ehr musikalischet Wark. Op jeden Fall lohnt sick dat aver, De Drangdüwels eenmol live to sehen, üm de unvergliekbare Atmosphäre un unglöövliche Böhnenpräsenz vun düsse Kapell to beleeven !